Uefa za ta biya kudin tikitin magoya bayan Liverpool, wadanda suka saya don kallon wasan karshe a Champions League a Paris a 2022.Hakan ya biyo bayan wani kwamiti mai zaman kansa da ya binciko cewar Uefa ce ta haddasa turmutsitsin da ya faru, kafin wasan karshe tsakanin Liverpool da Real Madrid.
Magoya baya da dama ba su samu damar shiga kallon wasan ba, an kuma bada barkonon tsohuwa a fafatawar da aka yi lattin minti 36 kan fara wasan.
Uefa ta ce za ta biya dukkan tikiti 19, 618 da aka bai wa magoya bayan liverpool, domin kallon fafatawar da aka yi a Faransa.
Real Madrid ce ta ci Liverpool 1-0 ta dauki Champions League na 14 jimilla.
A kakar nan kungiyoyin sun buga a Ingila a zagayen 'yan 16 a gasar zakarun Turai, inda Real Madrid ta ci Liverpool 5-2 a Anfield ranar 21 ga watan Fabrairu.
Real za ta karbi bakuncin Liverpool a wasa na biyu ranar 15 ga watan Maris a Santiago Bernabeu.
Liverpool, za ta je Sifaniya da kwarin gwiwa, bayan da ta doke Manchester United 7-0 ranar Lahadi a Premier League a Anfirld.
Ita kuwa Real Madrid, waddaa Barcelona ta ba ta tazarar maki tara a teburin La Liga, ta je ta tashi 0-0 da Real Betis ranar Lahadi.
0 Comments