Yanzu-Yanzu: Kotun Koli Ta Yanke Hukunci Kan Cigaba da Kewayawar Tsofaffin Naira Tare Da Sabbi

Kotun koli ta bayar da umarnin cigaba da zagayawar tsofaffin takardun kudi na Naira tare da sabbi har zuwa ranar 31 ga watan Disamba.

A wani hukunci da aka yanke, kwamitin mutane bakwai karkashin jagorancin Mai shari’a Inyang Okoro a ranar Juma’a ya bayyana cewa, umarnin da shugaban kasa Muhammadu Buhari ya bayar ga babban bankin Najeriya CBN na sake gyarawa tare da cire tsofaffin takardun kudi na N200, N500 da N1000, ba tare da tuntubar Jihohi ba, Majalisar Zartarwa ta Tarayya da Majalisar kasa, ya sabawa kundin tsarin mulki.

KARANTA WANNAN LABARIN: Kotun Koli Za Ta Yanke Hukunci Kan Sauya Fasalin Naira

Kotun kolin ta lura cewa ba a ba da sanarwar da ta dace ba kafin aiwatar da manufar kamar yadda dokar CBN ta tanada.

Hukuncin da mai shari’a Emmanuel Agim ya karanta ya kuma yi watsi da matakin farko na gwamnatin tarayya na kalubalantar ikon kotun koli na sauraron kararrakin da jihohi 16 suka shigar na kalubalantar manufar kudin.

Kwamitin ya ce CBN a matsayinsa na wakilin gwamnatin tarayya bai kamata a hada shi a matsayin jam’iyya a cikin lamarin ba.